اهلاً و سهلاً يا عرب

اهلاً و سهلاً يا عرب

شرفت بيتنا اللى انضرب

شرفتنى ... و سترتنى

و كنت سقفى اللى اتخرب

تشرب قهوة ؟

.. و لا بلاش

لحسن تحمى عليك بالليل

شرب القهوة للاوباش .

. اللى بيصحوا طول الليل

بس الليل ما عاد له نهار

لسه بينزف ابنى في ايدى

شايفه بيطالع فى الروح

اما البت التانية فسبقت

خرجت تلعب ويا صحابها

كانت طالعة في وقت القذف

قبل ما انادى عليها لترجع

سبقت ليها قذيفة يهودى

ساحت بنتِ لحم في عظم

و الشارع بقى بركة دم

سيبك م الغم ...

عايز تأكل ؟؟

لسه عندى شوية زيت

.. عايز زعتر ؟!

!يا غالى يا ريت !

!ده ما فيش لقمه جوه البيت

حتى البقال .. ضربوا محله من ساعتين

و الشارع مضروب نصين

ح نروح على فين ..

مالك مخضوض ؟؟

غارة و ح تروح ..

احكيلك ..

الواد امبارح .. جسمه كان بيطلع نار

و ضربوا ع الضيعة فوق الميت طن بارود

من صوت الضرب ..

نزفت ودن الواد بالدم ..

وقعت ام الواد ع الارض

سجدت تطلب م الرحمن

يلطف بالواد ..

و بكل العباد ..

و دعت لك .. اه و الله

بتبكى ليه ؟

ده حالنا احسن من ناس تانين

رايح على فين ؟؟

قبل ما تمشى ..

اسأل اهلك

...دم ولادنا في رقبة مين ..