قلب الحجر

انى مبشرٌ لمن يظن  المعجزات قد انتهت 

ان الاله قد بشرنا في الافاق من آياتِ 

فان كنا لم نشهد معجزات من سلف 

ففى انفسنا سيرينا الاله المعجزاتِ 

صبية لبثوا في كهفهم تسعاً و ثلاثمائة سنه

و فى كهفها لبثت عشرين من السنواتِ 

اراد الله ان ينجو بصبيةٍ لصلاحهم 

و اراد ان يُخرج من قلب الحجر ثمراتِ 

فما الاله ليمنع غيثه عن عبدِه 

و لكن الظلم يهز عرش الرحمن في السمواتِ 

عبثت بنعم الرحمن بجهلها 

فكان حكمه ان تعود الى القطراتِ 

فما الغيث بالمنعِ مضرورٌ بمنعه 

و انما المغاثُ بالمنع سيعيش على الحسراتِ 

واحده تانيه .. غيرك انتِ

قبل ما امشى لازم افهم ..

ازاى عرفتِ تسكنينى .. 

قبل ما امشى لازم اعرف .. 

ازاى عرفتى تجرحيني .. 

ازاى اشيلك جوه قلبي .. 

و انتِ رافضه تقربي لى .. 

ازاى عرفتى تخدعينى .. 

و لا انا .. كذبت عينى .. 

الحقيقه واحده غيرك .. 

نفس شكلك نفس صوتك .. 

نفس نبرة صوت سكوتك .. 

واحده تانيه .. غيرك انتِ 

كنت رافض انى احبك .. 

كنت حابب فيكِ هى .. 

واحده بس اللى في خيالى .. 

واحده تانيه .. غيرك انتِ .. 

انت عارفه انك انتِ .. 

كنتِ بره الاختيار ؟؟ 

كنتِ خصم في الخناقه .. 

كنتِ باب الانتحار .. 

هى بس اللى حاببها .. 

دق قلبي عند بابها .. 

كنت اشوفها عند نومك .. 

لما تسكت الملامح .. 

وقتها باكون معاها .. 

بتقابلنى بابتسامه .. 

وقتها الدنيا تضحك .. 

لما ترجع بالسلامه .. 

اما انتِ بالسلامه .. 

انتهت كل الفرص .. 

و اللى شايله ليك شايله .. 

صوره حلوه ليها هى .. 

صوره لسه جوه حضنى .. 

واحده تانيه .. غيرك انتِ .. 

نفس شكلك نفس صوتك .. 

نفس نبرة صوت سكوتك .. 

واحده تانيه .. غيرك انتِ 

بس برضو بتوحشينى .. 

اعمل ايه في قلب عاشق .. 

لسه فاكرك رغم غدرك .. 

اللى لسه في قلبي راشق .. 

لسه برضو بيناديكِ 

لسه عايز يحتويكِ 

لسه شايفك بنت حلوه 

عايزه لعبه يروح يجيبها .. 

عايزه غنوه يغنيها لِك 

واحده تانيه .. غيرك انتِ 

نفس شكلك نفس صوتك .. 

نفس نبرة صوت سكوتك .. 

واحده تانيه .. هى حبيبتى . 

ما تتأسفيش

ما تتأسفيش .. 

حاجات كثيره بتختفى .. 

على شان تعيش .. 

و ما تقوليش ..

لأم الشهيد انه مات .. 

و لا تقوليش 

ان الهتاف اصبح سكات .. 

الثوره قامت مش عشان حبة حاجات ..

و لو حد قال لك .. 

في ثوره بتتركب .. 

ما تصدقيش .. 

و ما تتأسفيش .. 

ما تستعجليش .. 

حاجات كثيره اتغيرت .. 

ما تنكريش .. 

و ما تصدقيش .. 

ان بلدنا اتدمرت .. 

ما تفوليش ! 

الثوره لسه في القلوب .. 

مش بالحريق .. 

و لا حدف طوب .. 

و الشهداء لسه في الميدان .. 

بيرددوا صوت الاذان .. 

بيقولوا "حى على الفلاح " 

ما تنسوش دم اللى راح ..

و ما تتأسفيش .. 

ما تقلقيش  .. 

مش ح ترسى ثورتى ..

على مافيش .. 

و لا ح يورث جتتى ..

خفافيش .. 

 طول ما احنا لسه بنتوجع .. 

و بنتسمع .. 

و قلوبنا لسه بتتخلع .. 

ع اللى واقفين في الطابور .. 

مستنيين يجى لهم دور .. 

و امهم .. 

تبقى ام الشهيد 

مش ح يجي اللى يعيد .. 

زمن الديابه و اللصوص .. 

بس انتِ اوعى ما تكتبيش .. 

و ما تتأسفيش .. 

... في الدنيا الهم

في الدنيا الهم نتلاقى ..
و نتفارق .. و بيننا وعود ..
و نطفح م العيون الدم ...
على لقمه .. و باب مردود ..
تكسرنا الدموع فينا ..
و تبقى شموع ليالينا ..
تقلبنا و تطوينا ..
على ناصية .. طريق مسدود

في دنيا الهم خطاوينا ..
بتتلاقى .. طريق مقصود
و ترجع تانى ترمينا ..
امانينا .. تراب مفرود ..
ماليش سلطان على الدنيا ..
و لا ف قوة ابن داود ..
جيوش الجن اسخرها ..
و اموت واقف بعود مسنود ..

في دنيا الهم حكاوينا ..
بتتكرر .. ميعاد موعود
بفرحه ف بحر .. امانينا
بنتصبر .. قدها و قدود !
يزيد القهر .. يغمينا
يلف الطور .. بحيل مهدود
يقول الصبر .. لحد القبر
يفوت العمر .. و يأكله الدود ..

مش عنده حلم

مش عنده حلم يكون بطل

.. مش عنده حلم يكون وزير

...مش عنده حلم يكون غنى

.. و لا يبقى له منصب كبير

.. كان حلمه بس انه يعيش

من غير ما حد يظلمه

و ان قال حرام يبهدله

و ان علّى صوته يقتله

كان حلم سهل

ناعم حرير

.. بيّن حلمه كان كثير

مش عنده حلم يكون بطل

.. مش عنده حلم يكون وزير

...مش عنده حلم يكون غنى

.. و لا يبقى له منصب كبير

.. مش هو بس

.. ده في كثير وياه كمان

فيه ناس بتحلم برضو ببر الامان

في وسط خوف

داير الوف

تحلم تشوف

الحق

لسه بيتسمع و بيتقضى

.. عند الامير

.. و ده حلم برضو كان كثير

مش عنده حلم يكون بطل

.. مش عنده حلم يكون وزير

...مش عنده حلم يكون غنى

.. و لا يبقى له منصب كبير ..

انا لسه باعشق

انا لسه باعشق

.. حضنها الدافى

.. الشمس

.. لسه بتوافى

.. و ضمة

.. نورها لكتافى

..و هى لسه بتشقشق

.. انا لسه باعشق

انا لسه باغرق

.. فيها لودانى

.. بتهمس

.. لسه عشقانى

.. و هى

.. جوه احضانى

.. حقيقه رافضه تتصدق

.. انا لسه باعشق

انا لسه باسرق

.. لحظه اقضيها

.. اعيشها

.. و لا اموت فيها

.. تقرب

..شوق يناديها

.. واشوفها قبل ما نتفرق

.. انا لسه باعشق

انا لسه بالجأ

..ليها تخبينى

.. بلدى

.. نارها تحيينى

.. بلدى

.. ترابها يكفينى

.. و نيلها السجن و الملجأ

.. انا لسه باعشق ..

صوت الدموع

صرخة الم ملو العيون

تفشفشنى

و صوت الدموع فوق الخدود

بيدوشنى

و يا ريتنى باسمعهم ..
ماشى في طريقي

ما بين فلوق وشقوق

حافى و بقاوح

جوه شوك مرشوق

و الخطوه فوق منها الهم

عاشق و معشوق ..

خلتنى اتوه بين الحدود

تدشدشنى

و صوت الدموع فوق الخدود

.. بيدوشنى

صوت الشوارع عامله ف ودانى

زي النفير

و الزحمه خانقه صدرنا

و لا تراب امشير

و السكه تقطم ظه

ر اجدعها حمير !!

و الحمل مربوط .. لجام مشدود

يهوشنى

و صوت الدموع فوق الخدود

.. بيدوشنى

كتبوا التاريخ

كتبوا التاريخ بالتمام

بعد ما التاريخ هدّوه

حشوه بأي كلام

و اللى يعيدوه يزيدوه

عملوا التاريخ اصنام

بدل ما العيال ينسوه

نسيو العيال التاريخ

و جم ع الصنم عبدوه

جت بعدهم اجيال

ورثوا الصنم .. خبوهو

جت بعدهم اجيال

نسيو فين حطوه

و جت بعدهم اجيال

في وقت زنقه باعوه

و جت بعدهم اجيال

سرحوا بيه .. غنّوه

و جت بعدهم اجيال

شتموا امه و ابوه

آدى حال اللى ورثوا تاريخ

ما فهوش جرام عملوه

..

... و جون و جون و جون و جون

و جون و جون و جون و جون

.. شوطه ف مرمى كام مليون

جابها ابونا في بلد الكورة

شافها العاقل و المجنون

و جون و جون و جون و جون ..

رد الازهر : ما قصدهاش

بندكت اخويا ما يعملهاش

في بقه العيبة ما يقولهاش

و اللى نقلها اكيد ملعون

.. و جون و جون و جون و جون ..

رد المفتى في السعودية

.. لازم تقول لى سوري يا عنية

و الا ح نعمل كام اغنية

تشتم اهلك فين ما تكون

و جون و جون و جون و جون ..

اما هنية و السنيورة

رغم الشدة كانوا في الصورة

كتر خيرهم .. شعوب معذورة

بس برقبة ميت مليون

و جون و جون و جون و جون ..

بس العترة اولاد اسيا

لسه فاكرين الدين مش ناسيا

عملوا مظاهرة قوية و راسية

شتمت جنابه الواطى الدون

و جون و جون و جون و جون ..

ابتدينا .. من سنه

ابتدينا .. من سنه

نكتب غناوي .. روشنه

نقول حكاوى ... مسكنه

! عن قلب غاوى .. مش انا

اما انا

مسجون ما بين الحلم و التحقيق

و الطريق

.. بعد اما يوسع و ينفتح

يرجع يضيق

و الحلم

بحر ما لوش قرار

اسود غريق ..

يرمى على ضفاف المدى جتتى

..و دمعتى

.. لسه بتعزف غنوتى

.. من غير ما تنزل ع الخدود

.. يا ريت يعود

.. بس اللى مات

.. عمره ما يرجع بالسكات

.. و ان كان سكاته حرفنه

!ابتدينا .. من سنه

ابتدينا

.. يبقى كل حاجه عادى

..ابات و اصحى

.. من غير ما دوحر او اهاتى

و ارجع اكرر

في اللى انا عايش فيه يوماتى

لا عندى بكره استنظره

و لا بيفرق

.. ايه راح تكون عليه حياتى

لكن بافكر

اخرتها ايه ؟؟

و لأمتى ح اقدر

ابات و اصحى في اللى انا فيه

و ارجع اكرر

.. ايام و شهور و طريق ممرر

.. ينزع م العيون الفرح و م القلب الهنا ..
ابتدينا .. من سنه